क्रांतिवीरु हेमू कालाणी
sujagusindhi 
क्रांतिवीरु हेमू कालाणी
सन उणवीह सौ बा॒एतालीह (१९४२) में भारत छडि॒यो मुहिम ज़ोर झलियो ऐं क्रांतिअ जी ज्वाला सिंधु प्रदेसु में बि॒ भभिकी।सखरु शहरु में स्वराज॒ सेना जे जमाइत हेठि हेमू संगि घणाईं सिन्धी नोजुवान सक्रिय थी विया।
हि॒क डीं॒हं हिकिड़ो गुप्तचरु हिकु दिलि दहिलाणिन वारी ख़बरु खणी आयो त स्वंत्रता सेनानियुनि खे कुचिलणु लाइ, सिंधु प्रदेस जे रोहिड़ीअ खां बलुचिस्तान जे कोएटा शहर ताईं वञणवारी बारूद ऐं हथियारनि सां लैस मिलेट्रीअ जी रेलगाडी॒ सखर शहरु मां बि लंघिणी आहे।
इहो बु॒धी करे हेमू समेत सभिनी जुवाननि जो खूनअ गरम थी वियो ऐं फेसिलो वरितो वियो त कंहि बि॒ सूरत में रेलगाडी॒ खे कोएटा पहुचण खां रोकिणो आहे।
२३ आक्टोबर जी राति सखरु छांविणी स्टेशन खां थोरो परे, हेमू ऐं बि॒या ब॒ साथी रेलपटरी जी फिश प्लेटूं खोलण लगा॒ पर उन तर्फ़ जेके सिपाही पहिरे ते हुआ उन्हनि खे शक पियो ऐं उहे अची सभिनी ते झपुटी पिया।
हेमूअ जा बाकी ब॒ साथी हेमू जे चवण ते हुतां डोड़िजी विया परअ हेमू उते जो उते ही बी॒ठो रहियो ऐं पकिड़ियो वियो।
जेलअ में हेमू खे कएं किस्म जूं तक्लीफूं डि॒नियूं वेयूं, मारियो वियो, बर्फ़ जे सिलियुनि ते लेटायो वियो, घणाईं ज़ुलमो सितम कया विया,बि॒या लालच पिणु डि॒ना विया पर हेमू जे वातअ मां अखरु न निकतो।
हेमू पंहिंजे साथियुनि जा नाला पोलिस खे कोनि बु॒धाया। फौजी अदालत, मजबूर थी करे, अग्रेज़ी मार्शल लॅा जे तहत हेमू लाइ ताऊम्र कारावास जी सज़ा मुकरर कयी पर पोए वरी फ़ैसिलो बदिलाए, सज़ा खे फासीअ जी सज़ा में तबदील करे छडि॒यो।
मुल्क लाइ जान कुर्बान जो सोची बि हेमू जी दिलिजाइ रही। इन्खा बि वधीकु अजबवारी गा॒ल्हि त इहा हुई त जेलअ में रहंदे बि हेमू जो वज़नु वधी वियो हो।
फासीअ खां अगु॒ संदसि माता जेठी बाई जे अखियुनि में आबु डि॒सी हेमू खेसि चयो त, “अमड़ि, तूं छोथी रोईं ?
“तूं ई त चवंदी आहिं, त आत्मा अजरु अमरु आहे ऐं सरीरु नासवंतु आहे।"
"अम्मा मां, भारत माता खे आज़ाद डि॒सणु लाइ वरी जनमु वठंदुसु।”
शूरवीर हेमू कालाणीअ एक्वीह जनवरी टेतालीह (21-01-1943 ) जी तारीख़ ते सूरीअ जे सडु॒ खे खिलंदे खिलंदे कबूल कयो।
हेमू जा आखरी लफ्ज़ हुआ "इंकलाब जिंदाबाद।"
लेखिका - रोमा चांदवानी 'आशा'
