लता मंगेशकर ऐं सिंधी गीतु - नारी लच्छवाणी

हिक भेरे सिंधी फ़िल्म "हलु त भॼी हलूं" जो हिदायतकार मदन जुमाणी ऐं मां कंहिं सेमीनार जे सिलसिले में अहमदाबाद में गॾु हुआसीं। ॿिन्ही जे रहण जो बंदोबस्तु हिक ई कमरे में हो, ॿई ॻाल्हियुनि जा ॻोठ। 
ख़बर नाहे पाण में केतिरियूं ॻाल्हियूं कयूंसीं,  तिन मां हिक हीअ बि हुई :- 

मदन जुमाणीअ ॿुधायो हो त लता मंगेशकर खां अवलि संदसि नंढी भेण आशा भोसले हिक सिंधी फ़िल्म "शल धीअर न ॼमनि" लाइ सिंधी गीतु "आउ अची मिलु ओ मनठार , तुंहिंजे विछोड़े मारी आहियां"
ॻाए चुकी हुई, जेको ज़बरदस्त लोकप्रिय थी चुको हो। इन गीत जी कामयाबीअ खां पोइ लता मंगेशकर खे बि हिर्सु जाॻियो त जेकरि मां बि को सिंधी गानो ॻायां। सो, हिक ॾींहुं मौक़ो मिलण ते संगीतकार सी. अर्जुन सां पंहिंजे दिलि जी ॻाल्हि ओरियाईं। 
तंहिं वक़्ति नईं सिंधी फ़िल्म "हलु त भॼी हलूं" जी शुरूआति थी चुकी हुई।  सी.अर्जुन सभिनी खे लता मंगेशकर जे दिलि जी ॻाल्हि ॿुधाई। ॿुधी, सभु ख़ुशि त थिया पर सोच में पइजी विया त लता मंगेशकर जे गीत ॻाइण जी जेका फ़ीस हूंदी आहे, उहा खेसि किथां अदा करे सघंदासीं। सभु मुंझी पिया।  ख़ैरु .....
हिक ॾींहुं मदन जुमाणी लता मंगेशकर जे घरि वञी पहुतो। खेसि, सिंधी फ़िल्मुनि जे बजेट जे मजबूरियुनि खां वाक़ुफ़ु कराईंदे चयाईं, "असां तुंहिंजी ख़्वाहिश खे पूरो न करे सघंदासीं; लाचार आहियूं।"  लता चयुसि, "मूंखे हर हाल में सिंधी गीतु ॻाइणो आहे ऐं ॻाईंदियस। तूं शिशदर न थीउ, पाण में ठही पवंदासीं   ..... ..... .....

फ़िल्म में गुंजाइश न हुअणु जे बावजूद, उन गीत लाइ जॻहि ठाही वेई। गोवर्धन भारतीअ लता मंगेशकर जी लेवल ऐं हेसियत खे ध्यान में रखंदे, गीतु रचियो,  सी. अर्जुन संगीत तयार करण में बि का कसर कोन छॾी। आख़िर गीत जी रिकॉर्डिंग थी वेई।
मदन जुमाणीअ, हिजाबु कंदे लता मंगेशकर जे हथ में,
संदसि मान में हथ॓ जोड़ींदे, हिकु बंदि लिफ़ाफ़ो रखियो। लता खांउसि पुछियो "हीउ छाहे ?" मदन जे जवाबु जो आशय/मतलबु हो  "फुलनि मुठि !"
लता मंगेशकर लिफ़ाफ़ो खोलियो। उन में रु.5000/- पियल हुआ। हुन प्यार भरी निहार सां मुस्कुरायो, संदसि पर्स मां के रुपया कढी, सभु मिलाए, कुल रु.11000/-  मदन जुमाणीअ खे ॾिना ऐं खेसि निउड़त वारे नोअ मां चयाईं, "मुंहिंजे पारां तव्हां सभिनी कलाकारनि खे....... "

अहिड़े नमूने हिक नायाब सूखिड़ी मिली वई सिंधी फ़िल्म-संगीत जे संसार खे महान गायिका भारत रत्न लता मंगेशकर पारां ...... " मुंहिंजा सुपरीं, तोखां विछड़ी, दिलि छा करे ? रोई रोई आहूं थी भरे"