संत कंवरराम साहिब जनि जी जीवनीअ

            जीअं त अव्हां सभिनी खे जा॒ण आहे त हर साल वांगु॒र इन साल बि संत कंवरराम साहिबनि जी वरसी निमित्त कार्यक्रम सजे॒ देश मे मल्हाया वेंदा, पर उन वास्ते कोरोना काल जे हलंदे असांखे प्रशासन जे नियमनि जो पालन बि करणो आहे.
            अचो साथियो असां सभेई गड॒जी करे संत कंवरराम साहिब जनि जी जीवनीअ जे बारे ॼाण गॾु करे पहिंजे बा॒रनि खे उन्हनि जो वधि में वधि जीवनु चरित ॿुधायूं...    

अमर शहीद भग॒त कंवरराम जी जीवनी

  जनमु--- 
                अमर शहीद भग॒त कंवरराम साहेब जनि जो जनमु १३ अप्रैल १८८५ मे वैसाखीअ जे शुभ डीं॒हं ते सिंध प्रांत में सख्खर जिले जे मीरपुर तहसील जे जरवार गो॒ठ में थियो हो. पीउ ताराचंद ऐं माउ तीर्थबाई खे हिकु पुट्र जी प्राप्ति थी जहिंजो नालो कंवरु रखियो वयो. कंवर जो अर्थु हूंदो आहे कमल जो गुलु.  

साईं जनि जी रुचि--- 
                 नंढिपण खां ई उन्हनि जी रुचि भग॒वान जी भग॒ती ऐं भज॒न कीर्तन में हूंदी हुई .पहिंजो घरु हलाइण लाइ उन्हनि जी माउ उन्हनि खे कुहर उबा॒रे डीं॒दी हुई. नंढिड़ो कंवरु पहिंजी मिठड़ी आवाज में गा॒ईंदो कुहर विकणंदो हुओ.

  गुरुअ सां भेंट---
                 हिक भेरे जरवार गो॒ठ में सिन्ध जे महान संत साईं सतराम दास जनि जो सत्संगु हली रहियो हो,उन्हीअ वक़्त नंढिड़ो कंवरु पहिंजी मिठड़ी ऐं सुरीली आवाज में गीतु गा॒ईंदो कुहर विकणदो आहियो, संत सतराम दास पहिंजे शेवादारियुनि खे चई कंवर खे सडु॒ करायो ऐ चयऊंसि त मिठा ! वरी भज॒नु गा॒इ. इहो बु॒धी कंवर जे दिल जो त गुलु ई खिली वयो.  

  रहिड़की दरबार जा थिया---
                
         तहिंखां पोइ रहिड़की जे प्रसिद्ध दरबा॒र में उन्हनि खे स्वीकारु करे वरतो वयो. पिता ताराचंद खे हिक पासां खुशी हुई पुट्र जे स्वीकारु थियण थे त बि॒ए पासे डु॒खु बि हो पुट्र जे विछोड़े जो.

संगीत जी शिक्षा---
                    कंवर संगीत जे महाज्ञानी हासाराम जनि खां संगीत जी शिक्षा वरिती ऐं पहिंजे गुरु साईं सतरामदास साहिब जनि जी छाया मे वडा॒ ज्ञानवानु बणिजी वया.

गुरुअ खां विछोड़ो---  
                  गुरु सतरामदास जे परमधाम वञण खां पोइ संत कंवरराम जे मथे ते पग॒ड़ी ,सरीर ते खादीअ जो चोगो॒ , कुल्हे ते गमछो , पेरनि मे घुंघरू ब॒धी संत कंवरराम गो॒ठ-गो॒ठ वञी भग॒वान जी भग॒ती करण लगा॒ .उन्हनि जे गीतनि में हिकु दर्दु ऐं पीड़ा हुई उहे अक्सर अमृत वेले में गा॒ईंदा हुआ उन्हनि जे गा॒इण मे सिन्धी सूफी संस्कृतीअ जो पैगामु हर हिक माण्हूअ ताईं पहुंचाइण वास्ते प्रचारक बणिजी गा॒ईंदा  हुआ. परियां - परियां खां खल्कि संत जनि जा गीत बु॒धण ईंदी हुई.

महात्मा गांधी सां भेंट---
                     हिक भेरे सिन्ध जे सख्खर जिले में महात्मा गांधी जो अचणु थियो. उन्हनि खे डि॒सण ऐं भाषण बु॒धण लाइ लखनि जी तादाद में खल्कि आई हुई, जहिं करे डा॒ढो गोड़ु बि थी रहियो हो.मंच ते उपस्थित सभेई नेता जनता खे शांत कराईंदे- कराईंदे हाराइजी वया पर गोड़ु शांत कोन थियो पोइ महात्मा गांधीअ खां आज्ञा वठी संत कंवरराम जी खे वेनती कई वई त अव्हां माणहुनि खे शांत करायो जीअं त गांधीजी जो भाषण शुरु करे सघिजे.जीअं ई साईं जनि माइक ते पहिंजे मुखारविंद मां आवाजु कढियो तड॒हिं समूरो वातावरण शांत थी वयो. इहो डि॒सी गांधीजी बि हिन लाड॒ले जी घणेई साराह कई...                       

मानव सेवा खे महत्व डि॒नो---  
                संत कंवरराम साहिब जो मुख उद्देश मानव- शेवा करण ई  हो. अंधिड़नि-मंडड़नि, सूरदास ऐं कोढ़ियुनि जी शेवा पहिंजे हथनि सां करे पाण खे धन्य सम्झंदा हुआ. चालीह वर्हियनि जी अद्भुत गुरुअ जी भग॒तीअ में इन संत जे जीवन में घणेई घटनाऊं घटिजी रही हुयूं.

मुअल बा॒र खे जीआरियऊं---
                शिकारपुर जे शाही बाग॒ में सुबुह- साण हिक माता पहिंजे मुअल बा॒र खे संत जी झोलीअ में लोली डि॒यारिण लाइ डि॒नो. बा॒र मुअलु हुओ , इहा जा॒ण रुगो॒ बा॒र जी माउ खे ई हुई .संत कंवर राम जनि पूरी शरदा - भग॒तीअ सां प्रभुअ जी आराधना कंदे जीअं ई लोली गा॒इणु शुरु कई तीअं ई संत जी झोलीअ में पयलु बा॒रु रुअण लगो॒. इहो चमत्कारु डि॒सी बा॒र जी माता साईंअ जे चरणनि में किरी रुअण लगी॒. उन बा॒र जे मुअल थियण जे बारे में समूरी संगत खे जड॒हिं जा॒ण डि॒नी त हुते हाजिरु सजी॒ संगत वाइड़ी थी वई ऐं साईंअ जी जय-जयकार करण लगी॒ .

समाज मे एको---
                  संत कंवरराम साहिब जी सदाईं समाज में एको वधाइण ऐं भाईचारो कायमु करण लाइ प्रचारु कंदा रहंदा हुआ. सांप्रदायिक सुभाव जे विरोधी हिक वडे॒ जिद्दी पीर हिन्दुनि खां बदिलो वठण लाइ सभिनी भग॒तनि खे भड़िकायो.उन्हनि डीं॒हंनि में कंवर राम साईं जनि हिंदुनि में जा॒तल-सुञातल व्यक्तित्व वारा हुआ.              
              जीअं त असां सभिनि खे जा॒ण ई आहे त अजु॒ जे डीं॒हुं ०१ नवंबर १९३९ ते साईं जनि खे गोली हईं वई हुई जहिंकरे उहे शहीद थिया हुआ. साईं कंवरराम साहिब जी वरसी निमित्त कार्यक्रम सजे॒ देश मे मल्हाया वञनि पया था.
             अचो साथियो असां सभेई गड॒जी करे भग॒त कंवरराम साहेबनि खे भावभीनी श्रद्धांजलि ड॒ई करे साईं जनि जे चरणनि में श्रद्धा जा गुल अर्पण कयूं,असांजे समूरे सिंधी समाज खे साईं जनि जे मथां फखुरु आहे.अजु॒ मां साईं जनि जे चरणनि में नमन करे उन्हनि खे श्रद्धांजलि अर्पित थी कयां.             
               असां साईं जनि जी जीवनीअ जे बारे में जा॒ण वठी पहिंजे बा॒रनि खे उन्हनि जे बारे में वधि में वधि जा॒ण डि॒यूं...

अंतिम सफरु--- 
                   १ नवंबर १९३९  जो डीं॒हुं मानवता जे इतिहास में कारे अखरनि में लिखियो वयो आहे. दादू जिले में स्थित मांझादनि जी दरबार में भाई गोविंदराम जी वर्सी उत्सव में भज॒न-भग॒तीअ खां पोइ पहिंजी भज॒न मंडलीअ सां गडु॒ साईं कंवरराम साहिब गाडी॒ बदिलण लाइ रात जो १०हें वगे॒ रुक स्टेशन ते पहुंता . ब॒ बंदूकधारियुनि अची साईं जनि खे प्रणाम कयो ऐं पहिंजे कम जे पूरण करण जी आसीस घुरियऊं.

हचारनि खे बि सफलता जो वरदानु डि॒नऊं---
                    साईं रेल जे दबे॒ मे दरीअ पासे वेही रहिया ऐं पहिंजे हिक शेवादारीअ खे जोर-जोर सां अखबार पढ़ी करे बु॒धाइण लाइ चयो. ऊंधाई राति में गाडी॒ हलंदे ई बंदूकधारियुनि संत खे निशानो बणाए गोलियूं हयूं . हरे-राम चवंदे संत जनि हमेशा-हमेशा लाइ ब्रह्म में समाइजी वया.

ब्रह्मलीन थिया--- 
                    सिंध जी पावन धरती हिक महान आत्मा जे रत्तु  में रंगिजी वई. सर्वधर्म सद्भावना जो झंडो फहिराइण वारे मानवता जे पूजा॒रीअ पहिंजा प्राण त्यागे छडि॒या . समूरे सिन्ध में हाहाकारु मची वयो. हुननि जे शहीद थियण जो समाचारु सजे॒ हिन्द ऐं सिन्ध जे कुंड-कुर्च्छ में बाहि जियां फहिरिजी वयो.

सोगु॒--- 
               इहा खबर बु॒धंदे ई स्कूल -कालेज बाजार सब बंद थी वया.चारई पासे शोकु छाइजी वयो. सभेई नर-नारी ,बा॒र-बुढड़ा लुछी-लुछी रुअण लगा॒. 
           अर्थीअ सां गडु॒ हजारें जालूं-मर्द, बा॒र-बु॒ढा, नंढा-वडा॒ सभई शामिल हुआ
            चवंदा आहिनि त जाइफुनि पहिंजा वार (केश) खोले मथे में रख विझी सोगु॒ मनायो हुयो, 
            सिंध मे तहिं साल डि॒यारीअ जे डि॒ण ते डि॒या भी न बा॒रिया वया.

साईं अजु॒ भी सभिनी जे दिलड़ियुनि मे---
                  अमर शहीद संत कंवरराम साहिब जी यादि में १९४० खां सजे॒ देश ऐं विदेश मे घणेई स्थाननि ते संत कंवरराम साहेब जी जयंती ऐं पुण्यतिथि हर साल मल्हाई वेंदी आहे.उन्हनि जी यादि में सिन्धी समाज पारां समाज-शेवा लाइ धर्मशालाऊं ,गऊशालाऊं, शिक्षण- संस्थाऊं ,अस्पताल, विधवा-आश्रम अजु॒ भी सुहिणे रूप सां पहिंजी-पहिंजी सेवाऊं  डे॒ई रहिया आहिनि.

महान आत्मा खे नमन--- 
             अहिड़े महान शहीद संत (जहिं धर्म जी खातिर पहिंजो बलिदानु डि॒नो) खे समूरे राष्ट्र ऐं समूरे सिन्धी समाज जे पारां कोटि-कोटि नमन ऐं वंदन........
             चओ अमर शहीद संत कंवर राम साहिब जी जय

          .... इतिश्री..... 
    
         सहेड़ींदड़........   
            
          तमन्ना मतलाणी
                      गोंदिया